MADROSAH ROMADHON

الحمد لله الذي هدانا لهذا وما كنا لنهتدي لولا ان هدانا الله. اشهد ان لا اله الا الله وحده لاشريك له, وا شهد ان محمدا عبده ورسوله. اللهم صل على نور الأنوار وسر الأسرار وترياق الأغيار ومفتاح باب اليسار سيدنا محمد المختار واله الأطهار واصحابه الأخيار عدد نعم الله وإفضاله اما بعد : فيا أيها المؤمنون... أوصيكم ونفسي بتقوى الله.. فقد فاز المتقون..

قال الله تعالى : يِا أَيُّهَا الَّذِينَ آمَنُواْ إَن تَتَّقُواْ اللّهَ يَجْعَل لَّكُمْ فُرْقَاناً وَيُكَفِّرْ عَنكُمْ سَيِّئَاتِكُمْ وَيَغْفِرْ لَكُمْ وَاللّهُ ذُو الْفَضْلِ الْعَظِيمِ -٢٩- الانفال

Hadirin jama’ah Jum’ah ingkang minulyo

Sepindah kulo ngaturaken wasiyat Taqwalloh (Taqwo dumateng Alloh) ateges nindaake sedoyo perintah Alloh lan nebihi sedoyo awisanipun. Mugi kanti taqwo meniko kito saged angsal perkawis ingkang sampun dipun janjiaken Alloh SWT arupi suwargi ingkang kebak kelawan ni’mat saking Alloh SWT Amin Ya Robbal ‘alamin.

Jama’ah Jum’at ingkang minulyo hafidzokumulloh

Dinten meniko kulo panjenengan taseh lumebet wonten sasi idul fithri utawi sasi syawwal, sasi sakbibaring kulo panjenengan nindaake kewajiban shiyamu Romadhon, puoso wulan Romadhon. Wulan Romadhon nembe mawon kapungkasan. Kulo panjenengan sami amung saged ngarepaken mugi sedoyo amal sholeh ingkang kulo panjenengan tindaake saklebeting sasi Romadhon kolowingi dipun terampi kalian Alloh SWT.

Sasi Romadhon minangkaning sekolah amal kulo panjenengan. Katah sanget pelajaran ingkang saged kulo panjenengan pundut saking kegiatan sasi Romadhon. Antawisipun, pelajaran Sabar, kuat, jujur, amanah, ikhlas, nuhoni kewajiban, nuceake manah, nunduake peningal, nulayani Syaitan lan panunggalipun. Sedoyo kolowau sampun berusaha kulo panjenengan tindaake wonten Romadhon ingkang kalampah kolowingi. Ananging wonten ing mriki, mboten namung kulo panjenengan cekap mangertoske mawon pelajaran ingkang saged dipun pundut, langkung saking puniko kulo panjenengan kasuwun saged berusaha netepi pelajaran2 kolowau wonten ing wulan2 sakbibaring Romadhon, ateges sesarengan kulo panjenengan ngistiqomahaken amalan2 sahe sasi Romadhon wonten ing Syawwal meniko lan sakterasipun, awit saking Sholat jamaah, sholat Sunnah, shodaqoh, puoso, tadarus Alqur’an, sholat dalu lan sakpanunggali pun. Keranten sedoyo kolo wau sejatosipun setengah saking maksud lan tujuan kulo panjenengan dipun wajibaken shiyam Romadhon.lan sedoyo wau minangkaning bagian saking dalan kangge kulo panjenengan tumuju marang ketaqwaan dumateng Alloh SWT.

Jama’ah Jum’at ingkang minulyo hafidzokumulloh

Piantun ingkang tambah Ketaqwaan dumateng Alloh punikolah ingkang sakjatosipun saged ngraosake maknanipun ‘idul fithri : sahinggo wonten dawuh :

ليس العيد لمن لبس الجديد # انما العيد لمن تقواه تزيد

(او كما قال)

Sanes riadin kangge tiang ingkang ndamel penganggo bagus # nanging sejatine riadin kangge tiang ingkang taqwane tambah dumateng Alloh

Milo penting sanget kulo panjenengan sakmeniko nggatosaken saestu punopo ingkang saged kulo panjenengan tindaake utawi ngamalake kangge njagi lan ngramut ketaqwaan dumateng Alloh SWT. Sampun ngantos sakbibaring Romadhon puniko kito malah soyo tebih saking Alloh SWT, soyo arang angsale ngibadah, soyo katah nglampahi duso Na’udzubillaahi min dzaalik. Milo kangge njagi awak kito piambak2 supados mboten ilang saking amalan2 Romadhon Gusti Rosulullooh SAW sampun paring contoh kanti dawuhipun ingkang nerangakaen pentinge kulo panjenengan nambahi ngamal puoso sunnah 6 dinten wonten sasi syawwal kanti dawuhipun :

عَنْ أَبِي أَيُّوبَ الْأَنْصَارِيِّ صاحب النبي رَضِيَ اللَّهُ عَن النبي صَلَّى اللَّهُ عَلَيْهِ وَسَلَّمَ قَالَ مَنْ صَامَ رَمَضَانَ ثُمَّ أَتْبَعَهُ بست مِنْ شَوَّالٍ فكأنما صام الدَّهْر

Kaceritaake saking setunggaling Sohabat Nabi, Abu Ayyub Al Ansori RA, bilih Rosululloh SAW dawuh : sopo wonge kang puoso Romadhon, banjur nerusake kanti puoso 6 dino ing wulan Syawwal, moko dewekne koyok2 puoso sampurno setahun (HR Abu Dawud & Muslim)

Jama’ah Jum’at ingkang minulyo hafidzokumulloh

Wonten mriki kulo panjenengan dipun tuntun dening kanjeng Nabi supados nyambung perkawis sahe kanti perkawis ingkang sahe ugi, sampun ngantos nyambung perkawis sahe kanti perkawis ingkang awon, utawi mungkasi perkawis sahe tanpo nyusuli perkawis menopoke mawon, artosipun among ngalap cekap saking perkawis sahe ingkang dipun lampahi. Kados dene kulo panjenengan ingkang saweg khatam Alqur’an, mulo kedah dipun susuli / dipun baleni kalian awal surat malih, sampun ngantos mandeg utawi ngalap cekap utawi malah dipun susuli kelawan perkawis awon. Milo mboten kengeng ugi nyampur perkawis awon kalian perkawis sahe.

Jama’ah Jum’at ingkang minulyo hafidzokumulloh

Saking punopo ingkang dipun dawuhaken dening kanjeng Nabi wonten nginggil wau, berarti paling mboten kulo panjenengan wonten ing sasi syawwal puniko berusaha saged nindaake puoso 6 dinten saking syawwal puniko keranten ageng sanget kautamanipun. Mboten mungkin kulo panjenengan kiat ngeparek marang Alloh kanti puoso 1 tahun penuh. Ananging cekap kulo panjenengan nambahi 6 dinten puoso ingdalem syawwal puniko sampun saged madani ganjaran puoso 1 tahun. Saklajengipun menawi wonten pitakonan : “kok saged madani ganjaran puoso 1 tahun ?” dipun jawab dening Ulama’ :

قَالَ الْعُلَمَاء : وَإِنَّمَا كَانَ ذَلِكَ كَصِيَامِ الدَّهْر لِأَنَّ الْحَسَنَة بِعَشْرِ أَمْثَالهَا فَرَمَضَان بِعَشْرَةِ أَشْهُر وَالسِّتَّة بِشَهْرَيْنِ

“kerono 1 kebagusan ingdalem Islam bakal diwales 10, mulo 30 dino puoso Romadon madani 10 wulan utawi 300 dino, lan 6 dino Syawwal madani 2 wulan utawi 60 dino”

Jama’ah Jum’at ingkang minulyo hafidzokumulloh

Kulo panjenengan ing mriki namung saged ngucapake MAA SYAA-ALLOOH LAA QUWWATA ILLAA BILLAAH. Ageng sanget welas asihipun Alloh SWT dumateng kulo panjenengan sami. Katah sanget babagan ngamal sholeh senajan sekedik ingkang dipun ganjar ageng kalian Alloh SWT. Puniko ngleresi kalian dawuhipun Kanjeng Nabi ugi bilih wonten perkawis 2 engkang dados pusat perhatosanipun Alloh SWT dumateng kawulanipun, inggih puniko Manah lan Ngamal / Tumindak kulo panjenengan sami.

إن الله لا ينظر الى صوركم وأموالكم ولكن ينظر الى قلوبكم وأعمالكم

Jama’ah Jum’at ingkang minulyo hafidzokumulloh

Ingkang terakhir kawulo ngajak dumateng pribadi khususipun lan jamaah umumipun, monggo sami nindaake pesen poro salafunas shoolih supados kito tansah ngenal lan ngeparek marang Alloh mboten amung wonten sasi Romadhonke mawon, nanging wonten saben2 wekdal, saben mongso, saben kahanan lan saben panggenan.

Meniko khutbah ingkang saged kaaturaken…

Sekedik khutbah ing Jum’at meniko mugi manfaati dumateng kulo panjenengan sami sak keluargo, lan sumrambah sedoyo Ummat Islam Amin Ya Robbal ‘Alamin.

وَالْعَصْرِ -١- إِنَّ الْإِنسَانَ لَفِي خُسْرٍ -٢- إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ -٣-

بارك الله لي ولكم في القران العظيم ونفعني وإياكم بما فيه من الأيات وذكر الحكيم وتقبل مني ومنكم تلاوته إنه هو السميع العليم